لن تحبي غيري فأنتي ملكي وحدي ... رواية مغربية ستحملك الى عالم اخر

4923 21/03/2011

الجزء 1 :

كانت جالسة في
الجردة اللي فالليسي وسرحانة فجو الهدوء مع انغام موسيقى my immortal
وعينيها مركزين فالنشاط والصبر الي كيتمتع بيهم النمل .. انت تشوفهم
كيتعاونو باش يحملو طرف صغير من بيمو وكل مرة كيسقط منهم وكيعيدو المحاولة
وقدامهم طريق صعيب مملوء بالعقبات اللي مستحيل تخليهم يتراجعو على انهم
يوصلو لمرادهم .. تمنات لو انها نملة وتقدر تدخل للحجور ديالهم اللي كتبان
ليهم مليئة بالالغاز .. مقدرتش تمنع عينيها من متابعة مسيرة النمل الصبور
وقالت فنفسها **ياريت كن كنت نملة** وضحكت بخفة

هبة**كوكو!!**

سارة سرحانة ومسمعتش صحبتها

هبة**وا سبحان الله انا راني هنا !! راه شحفتي evanescence مسكينة**

سارة**تمنيت نون نملة**

دارت هبة تشوف واش
التلاميد بعاد و طلقتها بضحكة خلات الكل ينتبه ليها وما حسات غير بظربة
على ظهرها .. دارت وعينيها مملوئين بالشرر وعندها رغبة كبيرة فمعرفة شكون
اللي تجرا يضربها

هبة فاش عرفات شكون تزنجات ** سمحي ليا ا اســــ ..ـتادة ما حسيتش براسي والله**

الحارسة العامة ** ليسي هدي ولا زدحة .. احترمي المكان اللي انتي فيه و دخلي لقسمك راه شطبتي الساحة **

هبة** سمحيليا **

دارت باش تشوف
سارة لقات غير الريح .. توعدتها فقلبها ومشات للقسم .. قبل ما تدخل سمعات
موشح من الاستاد .. لقات القسم عامر وسارة جالسه القدام هي وهجر وحابسة
ضحكتها .. تعمدات دوز من حداها باش ترمي ليها شي كلمة ولاكن خطتها فشلات
بسماع تهزيئة اخرى من الاستاد

الاستاد** واقيلا خاصم ديري نظاظر . راه كاع ما كاينة بلاصة فداك الصف .. سيري للصف الاخر و جلسي حدا جيهان

هبة كرهات راسها
حيث جيهان عدوتها المغرورة .. تمنات لو كان طردها احسن من انها تجلس حدا
جيهان .. لاكن استسلمت للامر الواقع وجلست وهي كتنعل سارة وكتحاول تفكر
علاش صبحات هاد النهار الفالصو

دازت الساعة
الاولى ديال الماط ناشطة شوية بالنسبة للتلاميد اما الساعة التالية فانت
مملة وكلشي مراقت ساعتو ويتخايل ليه صوت جرس انتهاء الحصة اما هبة كانت
حالة خاصة الحصة كلها دازت كي الحبس بالنسبة ليها

مع 12 البنات كانو
غاديين مجموعين .. سارة .. هبة .. هجر .. اكرام .. ليلى لاكن هبة وسارة
كيف العادة مشادين بيديهم وعاطينها للههضرة

هبة** الصراحة تقلقت درتيها بيا حشومة عليك ..وايلي درت لقيت طرتي ومشديتيش ليا بلاصة**

سارة**وراه جات جلسات ححدايا حشومة نقوليها نودي **

هبة**حطي كتاب ولا صاك اي حاجة المهم ميجلسوش ليا فبلاصتي**

سارة**ياك دابا انتي كتهمك البلاصة اما انا زايد ناقص **

هبة**مالكي bete اصلا حنا ديما كنبدلو الطاولة يعني الي كيهمني انتي نجلس حداك كوني دكية شوية

سارة متلات على انها مقلقة

هبة** وصافي راه الصراحة انا الي خصني نتقلق ماشي انتي

سارة**وصافي انتي .. عرفتي شنو هالعار قلبي الموضوع .. عاودي ليا على اليوميات ديال ستار اكادمي البارح كاع ما شفتهم**

هبة** والو فحال ديما رحمة ورمضان كي طوم وجيري .. انا راه داك البرنامج البايخ مصبراني عليه غير طاهرة وسلطان**

سارة**بينوهم في اليوميات ولا فحال ديما تهميش **

هبة**lol شنو كتسايني من ديك المسيحية ديال رولا .. اجي انتي علاش متفرجتيش بعدا **

سارة**راكي عارفاني محيلتي نتفرج فنور محيلتي ستار اكادمي**

هبة**اوووووف زدتي فيه والله هدي رابع مرة وانتي كتفرج فداك المسلسل وبزاف عوتاني**

سارة**شوفي بلا نقد عوتاني .. انا اي حاجة رومانسية كتعجبني **

هبة ** اوا عنداك دوبي**

سارة**فاش ندوب ديريني فالثلاجة**

هبة**هيهيهيهيهيهي بايخة حامضة مسوسة .. يلاه هزي كرامتك دابا **

سارة**ياااااك يلاه طلقي مني خليني نتلاح **

هبة** لا لا لا لا صافي والله منعاود ا زين ديالي **

سارة**نياهاها الله يعز الحكام ... حقا مبانش داك خونا اليوم ..فين غيكون زعما**

هبة**شنو بغيتيني نمشي ندق عليه نسولو ليك**

سارة**ما غديش ديري ما احسن منها **

هبة**واخا سايني حتال العام اللي معندوش باه **

سارة**المهم تكون عندو مو ماشي مشكيل باه **

هبة**كوني هانية يتيم جبتو من الخيرية**

سارة **عرفتي شنو ا زين واقيلا وصلنا .. انا غنتلاح ومع 2 دوزي عليا غنساينك صافي **

هبة ** اوكي يلاه moi aussi je tla7**

سارة**بايسن-زعما باي ههههه-**

هبة غمزتها ** كلك حركات **

كملات سارة طريقها
وكل شوية كتدور تشوف هبة فين وصلات حتى اختفات .. تفكرت سارة صحاباتهم الي
كانو معاهم فالطريق وقالت فنفسها-واقيلا دازو من شي درب-*

4923 21/03/2011

الجزء الثاني :

في
المساء كانت سارة فسريرها كتقرا رواية -محاولة عيش- .. عجبها بزاف اسلوب
الكاتب حيث قدر يدمج بين الدرجة والفصحى وبطريقة سلسة كتخلي القارئ ميتوقفش
على القراية .. كانت مندمجة حتى سمعت تلفونها كيصوني باغنية عبالي .. كانت
بنت عمتها اسماء المتصلة

سارة ** الوووو اسومتي **

اسماء ** غير سكتي الا معيطتش انا انتي لا .. من نهار عيد ميلاد مشفتك **

سارة**والله ا زين راه غير القراية **

اسماء **اينا قراية الله يهديك سيفطي غير ميساج بعدا .. اولا منين دفنوه ما زاروه**

سارة** ايوا راه كنت دايرة مع ماما غدي نبات عندكم هاد الوكند والله .. ولاكن انتي نيتك ناقصة**

اسماء**قولي والله **

سارة** دابا انا فين عمري كدبت علي **

اسماء** لا حاشا .. المهم انا غدي نساينك ضروري راه شريت شي افلام جداد نتفرجو فيهم انا وياك **

سارة** هي غدي نكبتوها **

اسماء**هههههه والله حتى توحشت هدرتك **

سارة** انا توحشت غير الياس **

اسماء**راه ديما كيبقى يقوليا لوني معايا كيما كدير سارة .. ساعة كنبقا نصدر فيه .. ناري انا معنديش الخاطر مع دراري **

سمعات سارة صوت ماماها كتناديها

سارة** اسومة حبيبة ماما كتعيط .. راه بدا البرايم .. سيري تفرجي حتى انتي .. ومن بعد نتكونيكطاو صافي ؟؟**

اسماء**واخا ا زين .. غير يسالي دخلي للمسن .. انا غنمشي نتفرج .. ztdr bébé **

سارة ** ztdr aussi ma belle .. prend soin de toi **

خرجات
سارة من بيتها ومشات تفرج فالبرايم ديال ستار اكادمي .. وطبعا كتنتقد الكل
الا طاهرة .. من بعد البرايم تكونيكطات شوية .. ومن بعد نعسات

----------------------------------------------

فاقت هبة الصباح .. دوشات ولبست بيجامة خفيفة لان الجو زوين .. مشات لعند ماماها

هبة** صباح الخير ست الحبايب**

امينة-امها-**صباح النور بنوتة ديالي**

هبة جلسات على الطاولة باش تفطر هي وامها ** فين بابا .. مغديش يفطر معانا **

امينة** لا راه عيطو ليه فالخدمة .. عندهم داك المعرض وخصهم يساليوه دغيا مبقاش ليهم الوقت**

هبة-تبالغ كالعادة-**وكاين 7000 مهندس .. بان ليهم غير هو .. **

امينة** ايوا راكي عارفة باباك كيعجبو كلشي متقون ومكيبغيش الغش**

هبة** ايوا هادا هو الراجل و الا فلا .. بضحكة خفيفة .. انتي اللي عرفتي تزوجي هههههه**

امينة** صافي ستي سكتي بدا البرنامج ديالي **

هبة** زيدي فيه .. راه مكنسمع والو **

جلسو تيفطرو و متبعين البرنامج على راديو fm .. سمعو صوت السرسار .. حلات هبة الباب من l'appareil بلا ما تسول شكون

امينة** انتي شي نهار غيدخل علينا شي شفار بقاي تشوفي شكون عاد حلي **

هبة ** الشفار غنبانو ليه غي...

قاطعهم دخول شيماء

شيماء بابتسامة كبيرة وعينيها كيبرقو من الفرحة ** surprissssssssssssssssssssssssssssse**

امينة ودموع الفرح معمرين عينيها ** توشحتك ا بنتي .. توحشتك بززززززززززززاف ** وضمت بنتها باشتياق كبيير **

هبة سلمات على زوج اختها زكرياء و ضمت اختها ** احسن مفاجاة درتوها والله **

شيماء ** قلت لزكريا بلا منعلموهم ونخليوها مفاجاة **

امينة** كيداير ا وليدي .. كيدايرة الوليدة .. والله حتى كنت ليوما غدي نعيط ليكم **

هبة حملت ولد اختها ريان و هو كيبكي ** اويلي ولدك مبقاش عاقل عليا **

شيماء ** ههههههه واش انتي باقا حمقة .. الدري باقي مكمل عام و مشافكش شهر ونص وكتقولي معقلش عليا **

هبة ** ايوا دابا كيغندير باش نفكرو عوتاني ** داتو لبيتها و جبدات ليه لعبة .. وخرجات لعندهم ** ايوا الحمد لله .. ها هو تفكرني **

زكرياء ** راه غير كيلعب وصافي **وخرج لسانو كيفقسها

هبة** شيمااااااااااااء هدري معاه **

امينة** هبة حشمي شوية **

شيماء ** هههههه راكي عارفة ا ماما هوما ديما مناقرين **

امينة** ايوا خصني نقولها لباباك راه خرج ليوما بكري للخدمة .. هبة سيفطي لباباك ميساج قوليها ليه **

هبة ** sorry Mum .. but i'm busy with rayan **

امينة ** هههههه شيماء .. ولدك سالا مع الدرية **

شيماء ** دابا غير نسايها .. زكرياء عيط لبابا انت .. انا غنمشي نبدل حوايجي وتجي **

بقات
هبة مشغولة مع ريان .. زكرياء كان كيعيط لاب شيماء .. شيماء مشات تبدل
حوايجها .. امينة كانت كتوصي الخدامة على الماكلة اللي غيطيبو فالغدا

4923 21/03/2011

الجزء الثالت:

من
بعد ما تغدات ناضت سارة توجد راسها باش تمشي لدار عمتها .. خدات شوية
الحوايج و هزات البيسي بورطابل ديالها و سلمات على ماماها و خرجات هي و
باباها باش يوصلها .. فاش وصلت لباب العمارة تفكرت بورطابلها

سارة ** بابا ديماري الطوموبيل بيما جبت بورطابلي نسيتو **

باباها-اشرف-**متعطليش **

طلعات سارة خدات بورطابلها و رجعات .. ركبات مع باباها ومشاو

صونات سارة وحلات ليها الخدامة-نعيمة-

سارة** شكون كاين**

نعيمة**كلشي .. راه عاد جا كمال**

سارة والفرحة فعينيها ** قولي والله**

نعيمة ** ودخلي وغتشوفي**

مشات سارة كتجري وشوق كبيير لولد عمتها وقلبها بقا كيضرب .. 2 عامين وهي كتساين هاد اللحظة

اول من لقات فطريقها اسماء عنقتها

سارة** بصاح كمال جا ؟**

اسماء وجهها تخطف ** اه **

ما انتابهاتش ليها سارة وتجاوزتها للصالة

دخلات للصالة ..اول من شافها هو كمال

شافت الشوق والحب فعينيه

ناض لعندها بسرعة عنقها

كمال ** توحشتك بزاف **

سارة بدات كتبكي ومعرفت ماتقول ونطقات بكلمة وحدة ** je t'aime **

شافت
كمال توثر على غير عادته كان موالف كيقوليها moi aussi ma 'tite ولاكن ردة
فعله هاد المرة كانت مختلفة .. بعد منها وبقا كيشوف فيها بطريقة ربكتها ..
حاولت تهرب من نظراته بانها تسلم على عمتها اللي ضمتها بحنان كبيررر
والدموع فعينيها .. حسات سارة بان شي حاجة مخبيينها عليها

عمتها-عائشة-**اجي ا بنتي حدايا **

سارة جلسات حدا عمتها وجات اسماء وجلسات حدا كمال وبقات كتهدر معاه بشوية

ارتبكات سارة بقوة ومعرفتش شنو كاين وقررات الهروب من الثوتر بانها تمشي تبدل حوايجها

سارة** عميتو انا غنبدل حوايجي ونجي **

امال**واخا ا بنيتي .. اسماء سيري مع ختك - امل كتعتبر سارة مثل بنتها **

ناضت اسماء ومشات هي وسارة .. دخلو البيت

سارة ** اسماء مالكي .. كنا جالسين وانتي كتصفاري و تخضاري .. شنو كاين **

اسماء بارتباك واضح ** اه .. لا لا والو **

سارة** اوف بلا ما تندميني انني جيت .. كلكم فشكل **

اسماء ** سارة كيفاش سلم عليك كمال **

تفاجات سارة من السؤال ولاكن حاولت تكون عادية ** ههههههههه وانتي مالك **

اسماء ** سارة مكنضحكش جوبيني **

سارة ** صراحة كمال تبدل .. فالاول فاش شافني حسيت بيه توحشني بزاف ولاكن فاش قلت ليه ...**

اسماء ** قلتي ليه je t'aime ياكي **

سارة** اه انتي عارفاني فهاد المواقف مكنعرفش نتصرف خليت قلبي اللي يهدر **

اسماء بعصبية ** يخ تفو حمار داك كمال .. كون غير ما جاش .. وانتي بقاي تابعة داك القلب **

سارة
تصدمات ** اسماء مالكي .. هدري راكم غتحمقوني .. هو حسيت بيه مشاعره تبدل
من جيهتي .. عمتي عينيها عامرين بالدموع .. انتي كتلوني .. قولي ليا شنو
كاين **

اسماء ناضت متجهة للباب شافت فسارة بنظرة حزن ** دابا غتعرفي **

سارة بدلات حوايجها و مشات للصالة باش تعرف شنو واقع وفقلبها خوف مانعها من انها تمشي لعندهم

دخلات
سارة و كانت كتشوف بتشكيك فالمنظر اللي قدامها .. قلبها كيضرب بقوة ..
حسات بالدنيا كتدور بيها .. ما بقا كيبان ليها والو .. وفجاة طاحت على
الارض ودمعة متعلقة برموشها رافضة تنزل وتريحها من الالم اللي مسباه ليها

-----------------------------------

فالمساء .. الساعة 8.30 pm .. منزل هبة

اب هبة - محمد -**مغديش ديرو ما احسن منها **

هبة ** لا لا لا غدا سيرو فيما بغيتو ولاكن اليوم انا باغا نشم الهوا **

امينة-ام هبة-**مالكي فيك الديقة .. خلي اختك ترتاح وغدا نمشيو **

شيماء غمزت هبة ** انا ارتاحيت وما فيها باس الى درنا لهبهوبة خاطرها .. راه اخر العنقود **

هبة ** هيهو مبروك علينا هادي البداية مازال مازال **

زكرياء-زوج شيماء-كيموت على هبة بالضحك ** هههههه يكما لاعبة مع تونس **

هبة بعصبية ** انت سكت كتفقسني **

محمد-اب هبة-** عرفتي شنو انتي لسانك طويل يلاه نودو لبسو حوايجكم .. انا وزكرياء غنساينوكم فالطوموبيل **

هبة ** ouais**

جرات شيماء من يديها و مشاو للبيت يبدلو حوايجهم

هبة رشقات لختها على يديها ** درناها ههههههههه **

شيماء كتموت بالضحك ** عرفتي رجلي ما قدراش نمشي عليهم .. انتي سرعتي الفيلم .. بقات فيا غير ماما مسكينة كسرتها **

هبة ** وهي باغا دير غي السبة .. نودي بدلي حوايجك دغيا قبل ما يطلع الواليد يدير بناقص **

شيماء ** واييه داك زكرياء تا هو دغيا كيطلع ليه الزعف **

لبسو حوايجهم وجلسات شيماء كتقاد المكياج وهبة كانت كتقلب ليها فصاكها

شيماء ** ههههه وليتي multi-parfum**

هبة ** هههههه مصطلح زوين .. خصني ندير ليه اشهار **

حلات امينة الباب ** شتكم سكنتو هنا .. ياكما جاكم نعاس **

هبة وشيماء ** ويتي ويتي ماما و الغوز .. صراحة جات معاك هاد الجلابة واعرة **

امينة بضحكة خفيفة** انا اللي جيت معاها .. جمعو الوقفة **

ناضت شيماء كتقلب فالجلابة ** امتى صاوبتيها **

امينة** عاد جبتها من عند الخياط البارح ودفعت ليه واحد التوب عاد خرج **

هبة ** درتي لبابا السيزي بالجلالب **

امينة ** لا قفطان ماشي جلابة ..**

خرجو من الدار و مشاو للكورنيش .. دوزو وقت زوين بزاف ..

هبة كتهضر لشيماء فودنيها ** وا ناري ماعيتوش من الهضرة يلاه معايا نهبطو لتحت نجلسو حدا الشجر **

شيماء ** هههههههههه هانتي ربع ساعة اخرى و غنمشي معاك **

زكرياء ** بغيت غير نعرف شنو كتقولو **

هبة ** شوف ما غاديش نقولك عافاك ولا الله يعطيك الستر .. غدي نهبط انا وشيماء لحدا الشجر و ندورو شي شوية **

زكرياء حرك راسو بالرفض ورغبته الوحيدة يعصب هبة وفيه الضحكة

هبة ** اووووووووووووووووووف .. بابا سالاو الرجالة من الدنيا ما لقيتي لمن تعطي بنتك **

محمد-اب هبة - ** نهار الي غدي ديري عقلك غدي نجيب ليك الدقة المراكشية **

زكرياء ** مالي معجبتكش ههههههه **

هبة ** لا معجبتينيش **

زكرياء ** مالك تلقاي فحالي .. الاناقة والتبوgيس .. غمر شيماء والرومانسية والطولة **

هبة كتخنزر فشيماء ** شفتك انتي بديتي كتدوبي **

شيماء ** ههههههههه زكرياء غنمشيو دغيا ونجيو .. انا عارفة هبة الا بغات شي حاجة مغديش تراجع عليها **

زكرياء ** ايوا منين قالتها l'ange مبقا ليا مانقول **

مشات
هبة هي وشيماء جلسو حدا الشجر وبداو كيهضرو ويضحكو و شوية ناضو كيدورو و
من بعد رجعو ومشاو كلهم بتعشاو فمطعم قريب للواد ورجعو للدار فرحانين

4923 21/03/2011

الجزء الرابع :

حلات
سارة عينيها والرؤية مزالت موضحاش بالنسبة ليها .. شافت الخوف فعيون عمتها
.. شافت الحزن فعيون اختها وتوام روحها اسماء .. لاكن الي شافته فعيون
كمال ممفهومش ..مقدرتش تترجم نظراته .. تفكرات كل شيئ طرا .. تفكرت الماساة
الي عاشتها فدقيقتين .. داز كلشي بين عينيها بسرعة البرق .. صورة مشوهة ..
اخرى مقطعة .. صورته كيلاعب بنته ومراته جالسه حداه كتوكلها .. صورته فاش
شافها اهتم لردة فعل مراته كثر منها هي الي كانت مستعدة تعطيه عينيها الا
طلبهم .. فتل اللحظات حست بالاهانة .. وكانها كانت مسخرة لمراته

طاحت دمعة بريئة من عينيها .. حست بيها كتحرق قلبها قبل خدها

حست
بيها اسماء الي كانت قلبها كيتحرق على اعز اخت عندها فالدنيا .. رهت خوها
ديك اللحظة .. كيفاش يتزوج وينساها .. وزايدها بالتعناق .. لعناتو فقلبها
وبقات كتمسح لسارة على شعرها

عمتها خدات الصينية اللي فوق الطبلة وقربتها للنموسية .. خدات 2 حبات من الفيتامين

امل-عمتها-**خدي ا بنتي باش تقدي توقفي على رجلك**

حسات سارة بملل مسبق من الحوار الي غيتفتح بينها وبين عمتها .. قررت تنهيه قبل ما يبدى

سارة بصوت مبحوح**عمتي والله انا لاباس و مخاصني حتى خير .. خصني نمشي قلت لماما مغديش نتعطل**

اسماء** ياك قلتي ليا فالتلفون غدي تجلسي معايا الوكند؟؟؟ لا والله ما تمشي **

سارة **اسماء بلا ما تبزي عليا عندي الفروض هاد السيمانة خصني نمشي والله **

عمتها
** لا والله ما تعتبي الباب انا غنعيط لباباك يدوز ادواتك لهنا باش تحفظي
.. موحشينك و شهرين هادي ما جلستي معانا .. غي كبرتي نسيتي عمتك اللي
رباتك**

سارة كيف سمعات هضرة عمتها قررات تبقى باش ما تقلقش اسماء

سارة** اوا منين قالتها عميتو ما بقا ليا ما يتقال **

اسماء بنظرة ترجي ** نخرجو ؟**

سارة** مغدي نديرو ما احسن منها **

امل**نيت تبدلو جو .. والليل ا بنتي يا سارة غنوجد ليك عشا الي غادي تاكلي صباعك عليه **

اسماء بمرح ** وفين غيركب ليها العريش الخاتم ؟**

سارة** فصباع رجلي **

امل** انا مشيت دابا عندي شي حوايج خصني نقضيهم .. متعطلوش 9 كونو فالدار عافا بنتي **

اسماء وسارة ** ان شاء الله **

-------------------------------------

فغرفة كمال

سناء ** دابا انا وليت زايد ناقص عندك **

كمال** سناء ماشي وقت الهضرة .. راسي ضارني بلا ما تكملي عليا والا غدي نخلي ليك هاد البيت كلو كاع **

سناء ** اهااااااه .. وصلت لهادي ؟؟**

كمال**اه
وصلت .. انتي السبب فكلشي .. ضحكتي عليا باش نتزوج بيك .. حيث عارفاني
مغديش نفرط فبنتي .. درتي هادشي كلو حيث طماعة .. همك كلو الفلوس .. -زاد
تعصب- متشوفيش فيا هاكا .. متمتليش دور المضلومة سمعتي .. انتي عارفاني كنت
على علاقة ببنت خالي .. ولان صحابلك غدي تربحي قلبي .. لا والف لا .. شتي
هذا - كيشير لقلبو - كينبض بسميتها .. اه باقي نبغيها .. انتي اللي قلبتي
عليا .. - زاد قسا عليها - متمتليش دور المضلومة .. الا ان شي د مضلوم فهاد
الجرة كاملة فهي سارة .. ومن هادشي كلو ياك انتي باغا غي الفلوس .. صافي
هالفلوس بين يديك .. الفيلا هانتي عايشة فيها .. الطوموبيل كل عام غدي
نبدلها ليك .. صافي هادشي اللي باغا ؟؟ نزيد ولا باراك **

سناء وقلبها كيبكي قبل عينيها ** ولاكن علاش غدير هادي الا مكنتيش كتبغيني **

كمال بسخرية ** على بنتي .. اما انتي مكتعني ليا والوووووووووو **

سناء
** ساليتي دابا ؟؟ كيصحابلك غدي نزيد دقيقة معاك من بعد الهضرة اللي قلتي
.. نصها كاين نصها لا .. اه بصح قلتي الصح انا بغيت الفلوس ولاكن ماشي حيث
طماعة .. بغيتهم حيث محتاجة بيهم .. محتاجة نعاون والديا .. محتاجة الفلوس
باش منكونش اقل من صحاباتي .. محتاجاهم لبزاف ديال الحوايج .. ولاكن الفلوس
والدل معندي مندير بيهم .. انا غدي نرجع لفرنسا .. كيف ما قدرت نعيش بوحدي
.. غدي نقدر نعيش بنتي .. سمح ليا الا خليتك ضيع عام ونص مع وحدة بزز منك
.. كنوعدك من اليوم مغتعاود تشوفني **

كمال بقساوة اكثر ** ديري اللي بغيتي **

سناء
** اخر حاجة بغيتك تبقى دايرها فراسك مزيان .. غيجي واحد نهار قريب ولا
بعيد غدي تبوس ليا رجلي باش نرجع ليك .. ديك الساعة غنرجع ليك ما درتي ليا
.. ديك الساعة غدي ندلك كيما دليتيني **

ناضت سناء كتجمع حوايجها وهزت بنتها ودموعها على خدها تحت كمال اللي كيبان عليه كانه كان كيساين هاد اللحظة من النهار اللي تزوجو

خرجات من البيت ومن الدار ومن البلاد كلها .. مخلية موراها رجل ضحى بزوجته وبنته من اجل حبه الماضي اللي ان ناسيه او متناسيه ففرنسا

------------------------------------

فمنزل هبة .. المساء 18.16 pm

هبة كانت كتغطي وجهها بالزيف ثم كتعريه

هبة ** عيوووووووووو **

ريان كينفجر بضحكة الاطفال البريئة اللي كتدخل البهجة على القلوب ** ههههههه .. عاوثيها -عاوديها-**

شيماء ** ريان حشومة علي عييتي خالتك **

زكرياء ** هههه بلا ما تحطو السبة على ولدي .. ختك منن اول مرة شفتها عنقها عوج ..**

هبة بققت عينيها ** ولايني وجهك صحيح .. منين عنقي عوج مبقيتش فيك تجيب ليا شي كلب نعنقو باش ميبقاش فيا هاد بوعناق **

زكرياء ** هههه حقا نسيت ما قتلي انا وجهي صحيح حيث كندير ليه الرياضة .. الى بغيتي نوريك la salle باش تولي فحالي **

هبة بجنون** mais nn حامض بزاف .. يخ يخ يخ .. مقدراش نستحملك .. شيماء ختي هالعار كيدايرة صابرة على فمو .. هضرتو فحال وجهو **

شيماء
** ادن غتون زوينة حيث هو زوين .. وبالنسبة للسؤال اللي قبل منو ديال
كيفاش صابرة على فمو .. راه غير حيث انتي هنا .. اما كون كاع ما صبرت ..**

هبة احمرت من الخجل ** قلال الحيا .. مقصدرين .. بينكم وبين الادب غير الخير والاحسان **

شيماء شافت ختها غادة بخجل** تكبري وتفهمي ههههههههههه **

4923 21/03/2011

الجزء الخامس :

خدات هبة بورطابلها واتصلت بسارة

سارة ** الو **

هبة ** سرسورتيييي توحشتك**

سارة** aussi bébé .. ça va ?? **

هبة ** wi ça va bien et toi **

سارة ** pas mal **

هبة ** علاش .. ياك لاباس **

سارة** لا متخافيش كلشي لاباس .. كمال جا **

هبة ** وايلي .. اوا كنظن بلي خصك تكوني فرحانة ا زين **

سارة ** ياريت كون بقا وما جاش **

هبة ** سارة شنو كاين **

سارة بنبرة حزينة ** كمال تزوج وعنده بنت **

هبة ** اويلي .. ولد الxxx **

سارة ** لا لا متنسايش راه ولد عمتي **

هبة ** ولاكن كيفاش تجرأ **

سارة ** مكيهمش كيفاش المهم انه دابا مزوج و كلشي سالا**

هبة ** لهاد الدرجة ا سارة **

سارة
بدات كتبكي ** شنو بغيتيني ندير .. ساينتو عامين .. عامين وكل ثانية وانا
كنفكر فيه .. مغابش على بالي لحظة وحدة .. عرفتي تمنيت كون خلاني عايشة
فالوهم وماجاش .. ولاكن الواقع هو انه جا .. قتل كل درة حب ليه فقلبي **

هبة ** سارة مبقيتيش كتبغيه ؟؟؟ **

سارة ** باغاني نكدب عليك ياك .. لا مكنعرفش نكدب .. الحقيقة هي انني باقا كنبغيه ويمكن كثر من الاول **

هبة ** سارة اللي غطاك بخيط غطيه بحيط **

سارة ** كون كان بيدي كون فقدت الداكرة باش نسى كلشييي **

هبة ** بيديك كلشي أ سارة .. تقدري تبداي من جديد و ترمي كلشي مور ظهرك **

سارة ** هادشي اللي ناوية ندير .. خصني نمحيه من حياتي **

هبة
** انا معاك أ سارة اهم حاجة خصك تعمري وقتك كلو ومتفكريش بزاف ** سارة
ديري فحالي ومتخليش الدنيا تعدبك .. فرحي ونساي كلشي وغتلقاي السعادة واحد
النهار **

سارة ** انتي قوية أ هبة .. بصاح كنعترف بلي انك تعدبتي كثر مني ولاكن انا تايهة دابا .. باغا نسى ولاكن كيفاش **

هبة ** كيفاش مكتقالش فالتلفون .. خصني نشوفك ضروري **

سارة ** انا غدا غدي نجي لدارنا و نتلاقاو فالعشية صافي ؟؟ **

هبة ** اه ضروري ولاكن انتي اللي خصك تجي عندي باش تشوفي شيماء راه جات ههههه**

سارة بفرحة ** قولي والله .. واوووووووو توحشتها والله .. صافي غدا فالعشية انا عندكم **

هبة ** وعنداك غير يجيك الزهايمر وتنساي **

سارة ** لا مغنساش هههه **

هبة ** سرسورتي حبوبة فكري لسعادتك .. كوني انانية هاد المرة عافاك .. قلبي على راحتك **

سارة ** نحاول ان شاء الله .. دابا غنخليك خصني نمشي نتعشى راه اسماء كتعيط ليا **

هبة ** واخا ولاكن غدا عنداك تنساي **

سارة ** لا لا اكيد غنجي .. بسلامة bisou**

هبة ** ztdr ma sœur .. bye bye**

ارتاحت سارة نوعا ما من بعد المكالمة ومشات تعشى مع عمتها

فمنزل هبة

هبة
كانت حالا المسنجر وفنفس الوقت كتقرا مواضيع عن اقنعة للبشرة والشعر ..
جاتها اضافة على المسن وقبلتها وما اهتمتش .. بعد دقائق قليلة فتح الشخص
معها محادثة

I’m the hero( الشخص ) : slt ** السلام**

The crazy girl ( هبة ) : slt .. t ki **السلام .. شكون انت **

I’m the hero : nass kaygolo cv ?? mashi t ki ** الناس كيقولو لاباس .. ماشي شكون انت **

The
crazy girl : wi kaygoloha l wa7ed kay3arfoh .. w ana makan3arfeksh ..
alors dis moi t ki**اه كيقولولها لانسان كيعرفوه .. وانا مكنعرفكش .. ادن
قوليا شكون انت **

I’m
the hero : ana kan3arfek bzf walakin nti maymknsh t3arfini .. 3rafti
3lash .. bkol basata maghadish ngolek ** انا كنعرفك بزاف ولاكن انتي
ميكمنش تعرفيني .. عرفتي علاش .. بكل بساطة مغديش نقولك**

The
crazy girl : alors j px pa te laisse dans ma boite .. kanhdar ghir m3a
li kan3rafhom ** ادن مغديش نخليك فالعلبة ديالي .. حيث كنهدر غير مع اللي
كنعرف **

I’m the hero : machi men mesla7tek tblokini ** ماشي من مصلحتك تبلوكيني**

The crazy girl : 3lash ??**علاش**

I’m
the hero : 7it ghadi ndir lik choha f lycée w f ay blassa tw93iha **
حيث غدي ندير ليك الشوهة فالمدرسة و في أي بلاصة توقعيها**

The crazy girl : hhhh kathadedni alors .. ok a3la ma fkhilek irkabo ** كتهددني ادن .. اوك اعلى ما في خيلك اركبو **

I’m the hero : ghadi tnedmi wllah **غدي تندمي والله**

The
crazy girl : chti lmoraha9a dialek ila jatek 3lia .. kanes7ek tmshi
dirha m3a we7da khra ** شتي المراهقة ديالك الا جاتك عليا .. كنصحك تمشي
ديرها على شي وحدة اخرى **

I’m the hero : walakin ana kanbghik bzf w man9darsh n3ish bla bik ** ولاكن انا كنبغيك بزاف ومنقدرش نعيش بلا بيك **

The crazy girl : lol **لول**

I’m
the hero : hmmm j pns khsek tnodi tmshi tgoli l khalti amina rah l3sha
rayt7ra9** كنظن خصك تنودي تقولي لخالتي امينة راه العششا غدي يتحرق **

The crazy girl : nari zakarya 9afrtiha wllah ** ناريييييييي زكرياء قفرتيها والله**

I’m the hero : hhhhhhhh tkhla3ti **هههههه تخلعتي **

نادت
هبة بالزربة كتجري لبيت ختها شيماء ورغبتها تنتقم من زكرياء راجل اختها ..
حيث في الاعماق خلعها واخا مبنتش ليه .. حلات الباب بالجهد وصرخت

هبة ** زكرياااااا**

قامت شيماء مفزوعة من سريرها ** اويلي مالك حماقيتي ا هبة .. مالكي كتغوتي **

مشات جرت الغطا من على زكريا ** نود انت .. داير فيها ناعس **

شيماء ** اويلي ا سارة سكتي .. راه عيان وناعس **

هبة كتشدو من كتافو ** نود .. طريتيها مني خلعة .. طيحتي ليا الما فالركابي **

زكريا كيمثل البراءة ** امالكي .. ياكما ضربك حمار الليل **

هبة ** اعترف انت اللي حمقتيني فالمسن **

زكريا** سيري حماقي على شي واحد من غيري ..مالقيت ماندير **

هبة جاتها البكية ** ولاكن ميكنش .. غير قول بليز واش انت اللي كنتي كتهدر معايا غي دابا **

زكريا بقات فيه سارة ** ههههه صافي تلاحي .. ضحكنا معاك ندمتينا **

شيماء ** اف زكريا .. مسكينة خلعتيها **

خرجات سارة كتغوت ** دابا مغديش نهدر ولاكن دابا نوريك **

امينة –ام هبة-** امالك عوتاني مع راجل ختك **

هبة ** دخل عندي لمسن وحمقني ا ماما .. مشات لعند امها وبدات كتبكي .. خلعني وصحابلي بصح **

امينة ** هههه صافي ماشي مشكل غير كيضحك معاك ا بنتي .. سيري تفرجي ولعبي مع ريان .. راه زكريا ضحوكي **

هبة ** ماشي تال هاد الدرجة هادي راه سميتها بسالة **

امينة ** هبة راه زكريا ضايف خصك تحترميه .. ولاكن انا كنشوف العكس **

هبة ** ماما راه كيفقصني **

امينة ** وصافي ا هبة متشديش عليه أي حاجة .. سيري تفرجي **

هبة ** واخا ولاكن هانتي غتشوفي جابا نرجعها ليه **

مشات هبة تفرج وبقات كتفكر المحادثة وكتضحك

تعشات سارة مع عمتها واسما ومن بعد مشاو كلهم ينعسو

في
الصباح فاقت سارة بكري على صوت ادان الفجر .. صلات ولبست سروال جينز رمادي
و بودي فالوردي البارد مكتوب من الصدر واكمامه مفصولة عليه .. جمعت شعرها
كلو الفوق وخلات خصلات منو على وجهها .. معملتش ميك اب ولبست صندل فالغوز
والرمادي .. واتزنت بعقيقها الطويل .. كان منظرها جداب بكل ما تعنيه الكلمة
.. قررت تخرج للحديقة تشم شوية ديال الهوا باش فاش تفيق اسماء تخبرهم انها
غدي تمشي لدارهم

جلست فالارجوحة اللي فالحديقة بقرب المسبح وسدت عينيها

كمال شافها من البالكو وقرر يهضر معاها .. بدل حوايجو وهبط لعندها** صباح الخير **

سارة كانت ساهية وفاش سمعت صوته حلت عينيها بصدمة ** كمال !!**

كمال ** سارة .. محتاج نهظر معاك .. بزاف ديال الحوايج خصهم يتوضحو **

قامت سارة بالزربة ** بالنسبة ليا كلشي واضح وكلشي سالا **

كمال شدها من يدها قبل ماتمشي وقال بضعف ** سارة بليز .. عطيني فرصة نهظر **

سارة ** انت كذاب .. فهمتي شنو معنى كذاب .. عامين وانا كنساينك .. عامين وانت كتخون حبي ليك .. بالنسبة ليا مبقى عندك ما يتقال **

كمال ** انا مستعد نصلح كلشي **

سارة
مقدرتش تستحمل ضعفه ومشات بخطوات بطيئة بعيد عليه .. نزلت دمعة على خدها
ودارت عندو ** انت كذاب .. مغنتيقكش نساني كيف ما غادي نساك **

خلاتو
موراها انسان محطم ومشات لداخل الفيلا كتبت ورقة لاسماء وعلقتها فالمراية
مكتوب عليها ** prend soin de toi ma belle .. jtm ** وخرجت من الفيلا
ولقات كمال قدامها

كمال ** مغنخليكش تمشي بوحدك فهاد الصباح **

سارة ** لا متخافش .. انا عارفة مصلحتي **

كمال ** لا غادي نوصلك ** وخدا منها الشنطة حطها في الطوموبيل ** يلاه ركبي **

ركبات حداه وطول الطريق وهما ساكتين .. بغا كمال يغير جو الكئابة اللي هوما فيه وحل الراديو وكانت اغينة هدى سعد

متفكرنيش باللي كان بيني وبينك

حرام عليك شوف لفاين وصلتيني

اللي بيا جرح كبير انت سبابو

نصبر حالي بالنسيان يداويني

استنيت كثير يبان هواك في سمايا واضح

واعطيتك حب تمنيت في يوم ربعو تعطيني

مات القلب اللي كان لغدرك يسامح

ومنين نجيب قلب جديد نبضو يحييني

خليتيني نكذب عيني ونسمع كلامك

غلطانة اني وهبتك روحي وخدعتيني

مبقاش ينفع معيا ثاني حلاوة اللسان

وفر وقتك وانسى اليوم اللي عرفيني

متفكرنيش باللي كان بيني وبينك

حرام عليك شوف لفاين فاين وصلتيني

اللي بيا جرح كبير انت سبابو
نصبر حالي حالي يداويني

نزلت
دموعها بصمت ولمحها كمال .. ضرو قلبو حيث هو السبب في الالم اللي سببه لها
ولاكن كان مقرر انه غدي يرجعها ليه باي طريقة .. حاليا قرر يخليها ترتاح
نفسيا ومن بعد يبدا يخطط كيفاش يرجعها ليه وكان متاكد انه غدي يقدر يرجع
الانسانة اللي تخلق على حسابها

لما وصلو قدام باب العمارة

سارة بصوت منخفظ ** شكرا بزاف **

كمال ** مخصكش تشكريني أ سارة .. انت عارفة انت شكون بالنسبة ليا **

خلاتو
سارة كيهضر و هزات شنطتها و دخلات للعمارة وقررت انها تخرجه من حياتها ومن
قلبها وتبدل حياة جديدة كيما نصحتها هبة .. تفكرت هبة و شيماء وابتسمت وهي
كتفتح باب شقتهم بهدوء .. دخلت لبيتها وبدلت حوايجها وشافت في الساعة
لقاتها باقا يلاه السبعة ديال الصباح .. قررات ترتاح شوية

4923 21/03/2011

في منزل سارة

خدات تلفون المنزل واتصلت بهبة

هبة ** الو **

سارة ** هبهوبة **

هبة ** يااااه انتي مازال في الدار انا على بالي جايا في الطريق **

سارة ** ههههه اويلي باقي الحال راه يلاه الثلاتة ديال العشية هادي **

هبة ** وسربي ا صحبتي عافاك سيري لبسي واجي **

سارة ** اوكي .. ساعة وانا عندك **

هبة ** الناس كيقولو دقيقة .. 5 دقايق ماشي ساعة **

سارة ** وراكي عارفة رحيلي تقيل **

هبة ** واخا ا لالة المهم دابا نودي لبسي راه انا وشيماء كنساينوك **

سارة ** واخا **

مشات
سارة لدولابها وبدات حيرة ديال شنو غتلبس وفي الاخير استقرت على بودي كحل
مرسوم عليه بنت كتسمع الموسيقى مشدود من الصدر وسروال جنز سليم في الكحل
ولي بوط ديال الدان في الكحل مزينين بصدفات لونهم ارجونتي و جمعت شعرها على
شكل ديل الحصان و حطت ميك اب خفيف و غلوس وردي و ماسكارا سودا وفكرت لو
تحط عدسات وحطتهم في اللون الرمادي

سارة ** مامااااااا **

وخرجت فرحانة عند امها ** اجي تشوفي هههههه **

ام سارة ** تبارك الله على بنتي .. الناس ولدو البنات وانا ولدت اللؤلؤ .. ولاكن ا بنتي عين الناس صعيبة قراي على راسك عاد خرجي **

سارة ** اوكي ماما يلاه see you **

في منزل هبة

هبة ** وععععععع مرضتيني خلطي مزيان **

شيماء ** متغوتيش عليا وزايدون شكون وراك هاد الكيكة .. هادي هيا ديال ضربني وبكا سبقني وشكا **

هبة ** حامضة تمامااا .. هانتي شوفي ديك الجيهة كاع ما خلطيتها وزايدون زيدي شوية فالسرعة ديري عالاقل 5 **

شيماء ** 20 لا انا موالفة كنخدمها ب 3 بلا ما ديري ليا الارارة **

هبة ** عرفتيي شنو كيما جات غتاكليها انا غنمشي نوجد العصير **

شيماء ** وسربي وغطي شعرك ا مريا كلارا نهار كامل وانتي مسولفة .. عمرك شتي شي حد كيشقا وشعرو مسبسب **

هبة ** شعري مكيطيحش القرع ... شافت زكرياء دخل المطبخ .. اعود بالله اذا حضرت الشياطين دهبت الملائكة انا غدا فحالي تخنقت **

زكرياء ** هههههه تلاحي نيت باش نلقى راحتي مع مرتي **

هبة ** اوا منين القدية فيها الراحة انا مخرجاش **

شيماء ** ههههههه هي باغا تفرجي فشي فلم هندي **

هبة ** وععععع مكتجيش معاكم االرومانسية معرفتش علاش **

زكرياء ** قولي والله .. اوا دابا نشوفو هاد المسخوط اللي غياخدك **

هبة ** نو نو حدك تما هداك اللي غناخد غيكون زوييييييييييييين فحال ديابلو **

زكرياء
** شيماء كل مرة ختك كتبدل العريس مرة باغة مهند مرة باغا اياد مرة باغا
اسود ولا اسمر مرة باغا ديابلو .. والعفوووووووو ا مولانا **

هبة تفقسات وحاولت متبينش ** شيماء انا غنعيط لسارة نشوف واش قربات **

زكرياء ** عنداك تحرقي راه بنتي ليا شعلتي **

هبة وهي خارجة ** تنكون وقيدة عاد نتحرق ا قليل الحيا **

زكرياء ** هههههه وليتي فحال مرتين الي هدر معاك كتقولي ليه قليل الحيا المصندلة **

هبة وهي خارجة ** الا انا مصندلة انت مسبط

جلست هبة كتفرج شوية وكتساين سارة حتى سمعت الصونيط

هزات هبة لاباراي

هبة ** دخلي دخلي الفكرون **

سارة ** هههه هانا جيت **

حلت ليها هبة الباب وعنقتها ** توحشتك الخايبة **

سارة ** والله حتى انا **

بدات سارة كدور حول نفسها ** مابانتش ليك شي حاجة غريبة **

هبة ** همممممم لووووول الناس والعوينات فالرمادي .. جيتي كي القطة **

سارة ** هدا هو المقصود **

هبة ** يكما باغا تدبري على راسك **

سارة ** الله يمسخك .. اجي شتك مخلياني حدا الباب مكينش مرحبا **

هبة ** هههه الحمقة داركم هادي دخلي **

دخلت سارة وجلسات هي وهبة ** فين شوشو **

هبة ** راه فالكوزينة مع روميو .. بدات كتغوت شيماااااااااااااء شيمااااااااااء **

خرجت شيماء ** امالكي .. هههههههه يا مرحبا يا مرحبا من جاءنا **

سارة ** توحشتك بزززاف والله **

شيماء ** داكشي علاش كتعيطي .. انتي نمرتي واقيلا تلفتيها **

سارة ** لا حاشا ولاكن غير الظروف وصافي **

جلسو البنات كيهدرو كلاو وفرحو وفنفس الوقت عاودت سارة لهبة وشيماء شنو طرا ليها من نهار مشات لعند عمتها

4923 21/03/2011

الجزء السابع :

في منزل سارة 06h00 am

صونا
منبة البورطابل .. ناضت سارة بتكاسل .. دخلت الحمام اكرمكم الله دوشت
وصلات .. عملت سيشوار لشعرها و لبست كسوة بنية بالكم مع ليبة و لي بوط قصار
.. هزات شعرها و خلات خصلات على وجهها .. خدات اكسسوارات مناسبة و هزات
صاكها ونزلت باش تفطر

سارة ** صباح الخير **

ام سارة ** صباح النور **

سارة ** فين بابا **

ام سارة ** فطر قبل منك ومشا **

جلست سارة تفطر بسرعة وخرجت مشات لليسي .. اول ما دخلت شافت هبة واقفة مع البنات قدام البلوك ديالهم

سارة ** good morning **

ليلى ** ويتي ويتي الناس والقهوي **

هبة
** ا ناري ناس كيقالو صباح الخير .. انتي بديتيهاب التبركيك هههه انا بعدا
تيقوني ولا متيقونيش والله ام شفت سارة واش لابسة القهوي ولا الشيبي هههه
**

اكرام بجدية ** هديك ا بنتي سميتها قوة الملاحظة ماشي تبركيك **

سارة ** ههههه قفرتيها ا هبة اش جا ما فكك من لسان اكرام .. الفلسفة مأثرة فيها بززززاف **

هبة ** لا لا انا ما فيا مانبداو نتناقرو عوتاني .. ندخل فحالي حسن **

اكرام ** اه حقا عندي ليكم خبار يلاه خرجت من الفران **

ليلى ** وساكتة اللفعة .. سربي قولي .. شنو كاين تاني **

اكرام ** شحال تعطيو بعدا **

سارة ** شخصيا غدي نتفوبر معاك ب2 تصرفيقات الى مطلقتيش راسك **

اكرام
** لا منين القدية فيها التصرفيق نطلق راسي .. اوا ا لاله راه جابو لينا
استاد جديد ديال الفيزيك حسن من ديك البطريق اللي كانت كتقرينا **

سارة بفرح كبير ** لالالالالالالا .. قولي والله **

اكرام بتباهي ** هههه وازيدكم من الشعر قصيدة .. استاد فنيون .. ديابلو وخلاص **

هبة ** لا لا لا .. نقولو زوين واخا ولاكن متخسريش الهضرة .. اش جاب ديابلو لاستاد **

سارة ** اه بصح ديابلو حالة خاصصصصصة **

اكرام ** اوا هاحنا غنشوفو فاش غدخلو واش مغديش تحلو فمكم **

سارة خلاتهم ** شخصيا مغنصبرش تيصوني الجرس غدي نمشي نشوفو **

هبة والبنات تبعوها ** من نهار عرفناك وانتي كتقولي شخصيا هههه **

ليلى ** الدرية معندهاش مع العموم **

غير قربو البنات للقسم بداو تيزربو

هبة كتجري ** والله تنشوفو انا اللولا **

سارة اللي قربت للباب ** لول متحلميش ا بنتي انا اللولا خصني نشوفو .. واش ديابلو ولا مهند ولا ..

قاطعها شخص قدام الباب ** الله يصبرني مع المراهقات هاد العام عوتاني **

من هضرتو عرفو البنات ان الوسيم اللي قدامهم هو الاستاد اللي هدرت عليه اكرام .. تزنجت سارة ودخلت حانية راسها سدو الباب وبدات الحصة

هبة ** ناري كحلناها بديناها من الاول هاكا يعلم الله اش غيوقع من بعد **

سارة بهدوء وصوت منخفض ** صافي سكتو قفرناها .. ناري البنات مركت مركت شوفو حاسا بوجهي شاعلة فيه العافية **

اكرام حطت يديها على فمها وهضرت بهدوء ** صافي هزي راسك متعيقيش **

هزت
سارة راسها ولقات الاستاد كيبتسم ليها سرحات لمده فملامح الاستاد وبدات
كتهضر مع راسها بلا ما تحس ** عوينات كحلين نيفو منقاد فمو صغير طويل وقلدة
شعرو رطب همممم حسن من ديابلو بزززاف

ليلى ** نارييييي درتي لينا الشوهة .. اللقوة اللقوة **

هبة ** سارة ا زفتة سدي فمك شوهتينا **

يلاه
بغات سارة تهدر بدا الاستاد كيقدم نفسو ** كنقدم نفسي .. انا الاستاد اياد
برادي .. استادكم الجديد لمادة الفيزياء .. غدي نكمل معاكم المقرر من
الدرس اللي بقيتو فيه وغدي نحاولو نزربو لانكم معطلين بزاف .. ان شاء الله
منلقاوش مشكيل مع بعضياتنا .. أي استفسار في الدرس او اشكال واجهكم في
الدرس في المنزل تقدرو ترسلوه ليا على الاميل ديالي

كتب الاميل ديالو على الصبورة

وبدا كيشرح الدرس

سارة ** معندي مندير بيه ادن مغناخدوش **

ليلى ** اوا ويلا لقيتي شي سؤال **

سارة ** كاينين السوايع الاضافية **

هبة ** انا غناخـــــ ..

الاستاذ ** اخر اندار والمرة الجاية ديك المجموعة غدي نخرجكم ومغنقبلكش الا حتى تجيبو ولي امركم **

سارة بصمت ** مالنا ابتدائي **

الاستاذ** سمحي ليا آ انسة شنو قلتي **

سارة ما لقات ما تقول ** لا ا استاد ما قلت والو **

الاستاذ ** ادن عيني ماشي خوت **

ليلى بمرح ** لا ولاد عم هههه **

الاستاذ ** لا هادشي بزاف يلاه توكلو على الله .. الباب **

اكرام ** استاد انا مهدرتش علاش غنخرج **

الاستاد ** ضحكتي واخا مهدرتيش **

سارة من النوع اللي مكيبغيش يبقا يتراد مع الاستاذ جمعت صاكها بهدوء و ناضت باش تخرج

الاستاذ ** ما شاء الله باينة فيك باغة تقراي .. جاتك من الجنة والناس **

سارة ** لا استاد عارفاك مغديش تخلينا نبقاو .. داكشي علاش فضلت بلا ما نتناكرو ونخرج بكرامتي **

الاستاذ ** اصلا الكسول عمرو ما كانت عندو الكرامة **

سارة ** شكرا .. ابتسمت ليه وخرجت **

الاستاذ وقفها عند الباب ** دكريني بالاسم ديالك **

سارة ** سارة ال .....**

الاستاذ ** اجي ا سارة **

مشات وقفت قدامو

الاستاذ ** شحال جبتي العام اللي فات **

سارة ** فاش ؟؟ **

الاستاذ ** الفيزيك **

سارة ** 19.5 **

الاستاد بتردد ** وفالدورة كلها **

سارة ** 16.83**

الاستاذ ** الا مكنتيش كتكدبي فانتي متفوقة تبارك الله .. تقدري ترجعي تكملي الحصة **

سارة ** شكرا **

ابتسمت
ورجعت لبلاصتها وكملو الحصة ديالهم بانتباه و سجلو اهم النقط اللي دكر
الاستاذ وعجبتهم طريقة الاستاذ في شرح الدرس وفي الاخير خدات سارة اميل
الاستاذ بعد تردد كبير

» كتاب : عالم الجن والملائكة .. تحميل كتاب عالم الجن والملائكة تأليف عبدالرزاق نوفل
» { غرف نوم ........ مغربية .........تقليدية }
» احلئ نكت مغربية
» اريد أن أعيش آلامي وحدي......(إهداء لأخي الغالي فاتح).... بقلمي
» عالم الفيتامينات ...